好痛T_T

9月21(日）

家居安全好緊要！

話說：

星期日晚上我同朗仔沖涼洗頭

跟住入房拎毛巾 諗住幫朗仔吹乾頭睡覺

點知 出黎見到朗仔大力fing 緊獅子掛飾

因為大力得制 掛飾跌咗落地

朗仔行前一步想拾起， 就踎底 

從腳板底抆起粒釘 跟手坐晌地上大喊

嚇鬼我囉

朗仔踩中釘呀

我立即抱起朗仔落梳化 檢查下個傷口

好在傷口唔算大 又冇標血 

再望下粒釘好在冇生銹 

但朗仔喊到拆天咁 

搞到我心都亂晒 

呢個時候爸爸返黎 爸爸立即打電話問做姑娘的3姑應該點處理。

用消毒約水紙巾抺過傷口，貼上膠布

氹下朗仔 請佢食糖 過一陣

朗仔話有少少痛 

跟住企咗晌度 跳咗一下

真百厭仔

就係呢個獅子掛飾。經過今次事件後 比朗仔要求掉落垃圾桶了

就係呢粒圓圖釘 從獅子仔身上跌落地 比朗仔踩中

腳板底一個傷口

爸爸替朗仔清理傷口

媽媽個心都拿住拿住痛

以後所有玩具家品都要檢查一番

搵食@大坑

9月14（日） 晴

今日爸爸話帶朗仔去中央圖書館睇書

所以 去咗大坑食早餐

 

 

 

 

第一次踏足大坑, 我地一家三口, 好似大鄉里出咁井, 感覺好新奇. 周圍逛, 周圍搵, 經過一間鐵皮茶檔-炳記，好懷舊！突然間好想試下同朗仔踎大排檔好食野飲奶茶，但此終都等唔到位 而且天氣又熱鬼辣辣，企一陣等位爸爸朗仔都熱到出晒汗，仲邊有心情食野？！最後都放棄了。

又行行下，見到呢間茶餐廳，門面寫有50年歷史，於是入去食早餐

 

咖央多

 

朗仔第一次食咖央多

食到lam lam 脷

# 源品車仔麵茶餐廳                                                                              

地址: 大坑京街18號地下

 

  食完早餐 ，便起程到中央圖書館，又係第一次去，好大！兒童圖書佔全層樓，其中一處係遊樂室，但要預先上網Book 時間入場，朗仔好想入去玩，可惜早午都full booking 冇辦法即場登記，唯有等下次先啦。

在圖書館逗留了個幾鐘後離開，又回大坑（食街）行下，呢處真係好多食肆，中、西、泰、日、意、越.....各色其色，乜都有，有d 裝修仲好特別添。

Hello Kitty Secret Garden 
大坑安庶庇街19號地下


下次有時間再黎搵食

馬鞍山渡頭村 BBQ

9月13(六) 晴

 

 

今日的黃昏 - 渡頭村BBQ場

 

====================================================

 

今早在荼餐廳食早餐時, 同爸爸商量,  可以比朗仔踩單車入BBQ場, 又因為晚上的關係, 我同爸爸講要加支電筒, 放在朗仔的單車上當作車頭燈用.

 

點知, 下午返到屋企,

朗仔第一時間入書房, 見佢走出走入, 望下佢做乜.

 

 

原來朗仔準備緊佢架單車, 走來走去係, 搵個青蛙燈籠掛在車頭上.

我見到立即會心一笑. 估唔到朗仔會偷聽我同爸爸的對話, 仲會記上心頭.

用自己的方法去解決 / 處理 , 好叻仔.

 

 

燒野食, 我好鍾意食...... 其實, 好熱.

=============================================================

 

同場+映 

今朝帶朗仔去 剪頭髮

短咗 ！ 清爽！

元朗一天遊- 農場鮮奶有限公司+壽桃牌展覽館

9月9（二）晴

今日假期 爸爸話出外遊走下喎


今次第二次黎喇, 朗仔大個仔了, 識得點樣喂羊仔....

 

專程駕車入黎, 當然要幫襯下啦..

飲牛奶, 食芒果布甸 ,  薑汁揰奶 .

 

 

農場鮮奶有限公司

位於: 元朗石崗甲龍村雷公田78號

電話: 2832 9218

 

======================================================

 

 

喂飽咗我地個肚同羊仔個肚後,

駕車去  壽桃牌展覽館買嘢

 

估唔到呢間壽桃牌門市 樓上有間飯堂. 我地上咗去食午飯

 

晚上可以訂枱, 食私房菜.

壽桃私房菜餐廳火鍋食館
地址: 元朗宏業南街12-18號新順福中心1樓A-B室
電話: 2323 6188

泊車位唔多, 先到先得

中秋夜

9月8 ( 一)

中秋節快樂!

今日除咗中秋節外, 又係施師奶曲農曆+新曆的生日大日子

下午同公司成班同事去食飯, 食得好飽好滿足.

臨放工前, 同事又拎上生日蛋糕來, 好窩心.

晚上, 老公送上生日蛋糕來, 一家三口好溫馨

食完飯, 去嫲嫲屋企樓下賞月, 玩燈籠, 點爉竹.

返到屋企 竟見到......

中秋節前夕- 迎月活動

9月7 晴 (日)

今日星期日, 爸爸話不如去瀝源村食早餐

盛記麵家 我第1次黎幫襯，裝修怪怪，食物一般 選擇唔多.

估唔到有盆菜供應

一坐底 就比支益力多我個仔飲

食完早餐去咗爸爸返工的地方拎野

==　==

晚上 一大家人去了尖東金巴倫道

食中秋團聚 自助餐

食到最後 佢地玩層層疊