小B 大日子 -- 返學第十天 ~ 獨自上課day 5 ( 3個鐘 )

8月29( 四)

今日嫲嫲話小B 已經識得路. 但走到學校附近朗朗就開始二行眼淚....
唉我聽到都心up..


老師話佢一番到去就想周圍行，於是老師叫朗朗幫幫手

老師叫朗朗幫手將體溫卡收入同學的書包裏 (當然老師有從創傍逐個指比佢睇啦)
有版有眼呀, 但係... 派派吓卡, 佢就攞同學仔的杯出來睇，老師話佢勁有探索精神

點知... 老師話佢懶尿/ 屎

小B 大日子 -- 返學第九天 ~ 獨自上課day 4 ( 2個鐘 )

8月 28( 三)

老師話今日同昨日 差唔多, 冇大吵大鬧 !


今日 食蘋果 同玩樂器. .

明天開始 正常了,  要返三個鐘. 希望朗朗能習慣啦~

小B 大日子 -- 返學第八天 ~ 獨自上課day 3 ( 2個鐘 )

8月27（二）
因為昨日係學校打臘放假一天，所以朗朗連放三日，怕佢唔習慣，於是叫咗紅姑同嫲嫲一齊返朗朗返學。
紅姑話，朗朗B冇，仲自己行入課室
但係今早在我家裹時，就係咁話要去嫲嫲屋企！

另外, 學校裏仲有其他細路喊呀。

麥老師whatsapp 我，話今日朗朗幫手派禮物, 又話佢好醒，一見阿嫲就滴淚
老師講會慢慢訓練他坐定定。唔比周圍走，但要有心理準備他會哭，因為要佢坐底佢情緒就波動, 又話朗朗有試探老師，當老師行開就起身，見佢幾次，都要求番佢坐下，就大叫大哭，見老師仍堅持就坐下吃茶點.

11幾，嫲嫲打比我傾番今日的事，話接佢放學時，朗朗又不段問紅姑紅姑.


朗朗開始習慣, 知道要面對返學的日子 .....

幫手派禮物

小B 大日子 -- 返學第七天 ~ 獨自上課day 2 ( 2個鐘 )

8月23( 五)

 

今日爸爸晏少少返工, 幫手帶朗朗返學, 點知行到學校附近開始喊了, 佢不段仲話唔返學 , 唔返學, 爸爸抱住入去, 行到學校門口, 又look晒地咁. 老師話見嫲嫲個樣又好擔心咁......

入到課室, 老師未關好門, 朗朗已經走去自己個位, 拉開張"鄧"想坐, 仲望一望老師, 老師就同朗朗講 "坐啦" , 坐底後, 開始玩玩具, 玩玩下又開始想喊, 但好平靜, 老師問朗朗想唔想坐車仔, 老師推架車仔入課室, 朗朗就立即上車渣. 仲渣咗好耐, 唔肯落車.
到10時到, 老師播<< 反逗車王>> 朗朗才肯落車咋.

 

去到10時許, 朗朗又周圍行, 唔肯坐底, 於是老師叫朗朗不如幫老師貼相好唔好, 朗朗立即話好 ! 仲幫手掉紙落垃圾桶, 一張一張掉, 掉完一張, 又問老師拎紙碎掉, 老師話好叻好幫手, 仲問我平時在家有做家務 ?  

到放學, 老師話佢仲坐住唔肯走 !

哈哈哈~

小B 大日子 -- 返學第六天 ~ 獨自上課day 1 ( 2個鐘 )

22/8 (四)

 

今日我都係放假, 首先昨晚2~3AM 小B突然瞓醒, 搞到4:00AM 才正式入睡,

今朝唔願起身, 又唔肯痾C , 所以我比少咗奶奶 .

今日 係佢地班小朋友獨自 上課2個鐘的大日子, 行到 窗前已經聽到震耳的劏豬聲音,

我個心已然好安落, 帶小B 入到班房, 班主任已經扯小B入房仲立即關門, 我連一句BYEBYE 都冇得同小B講, 跟住我就聽到超大喊的聲晌, 仲有拍門聲, 個心立即好唔舒服仲好傷心tim, D眼淚仲想湧出黎, 我係媽媽來, 唔可以怕!  所以我要離開現場, 獨自去商場食早餐, 等時間.  

 

等到差唔多十時, 老師打比我, 話小B 異常地冷靜, 叫我唔洗10時接, 改到 11時啦, 嘩, 我個心安落晒.................
11:00 am , 等放學, 嫲嫲入去接朗朗, 嫲嫲話佢一見到嫲嫲就問媽媽.... 周圍搵媽媽.

放學派 增寶珠食.

下午, 帶朗朗B去牛頭角接爸爸放工 .

 

晚上, 老師whatsapp 了今日影朗朗B的學校相. 跟住佢CALL 我了

 

 

「朗朗其實都喊咗成個鐘, 一入到去課室, 朗朗有跳! 有大喊! 仲走去大力拍門, 但老師唔理佢, 拍咗幾下就冇拍門了, 跟住又想撞牆, 老師話幅牆有圍住軟墊, 所以冇理佢, 咁朗朗見老師唔理佢, 佢就好細力撞咗一下(持登做比老師睇 ), 點知有人個小朋友學佢添呀,  之後, 又見朗朗look 地沙, 老師見狀仲走去攞張軟墊出黎諗住比佢look, 點知朗朗見到張軟墊就立即企番身唔look. 　

朗朗又走去放自己的書包的櫃前周圍摷野, 老師話唔可以亂搞, 跟手比咗隻公仔朗朗叫佢只可以打佢, 咁朗朗真係聽從老師的指示, 只拍隻公仔來發洩 !

後其開始冷靜下來, 朗朗又周圍行來行去, 老師怕佢周圍撞, 叫佢不如行去電腦嗰邊, 朗朗唔肯, 突然間小B見到放鞋處走過去, 老師又怕佢將所有鞋fing 出黎, 想走去阻止佢時, 原來佢冇咁做, 仲識得搵番自己張相, 自己隻鞋, 仲諗住除鞋換鞋, 老師覺得好得意呀 !!!

 

當朗朗冷靜咗後, 坐埋一邊玩玩具時, 老師問佢要唔要玩ipad時, 朗朗話唔玩, 但又見到其他小朋友玩時, 老師 見佢又望住人好想玩咁, 所以交比佢玩下, 之後又好定地坐晌度睇兒歌.....

 

到後其, 有小朋友開始喊, 小B 又想喊囉, 但唔算太激. 」

 

小b的大日子 --返學第五天

8月21（三）

唉
為咗朗朗B的情緒，我今日特登請病假陪太子上課，

入到學校門，老師校長都認得朗朗B, 見到我就話：咦！今日媽媽陪喎...

入到課室，叫朗朗自己坐，我交書包比老師，坐底咗的朗朗自己玩玩具，睇電視播的兒歌，家長門都認得朗朗B!
老師同家長們續個傾計，麥老師同另一個老師都同我講昨日的情況比我知，都傾咗好耐，大家見今日朗朗比昨日平靜。
可能有媽媽在身道, 係唔同d，我估我比到佢安全感。

上課聲晌起，朗朗有少少緊張，
老師要學生們收拾玩具交比老師，我叫佢自己拎比老師，其實佢都肯的，跟住今日老師教小朋友唱歌 : " A for apple "  ，朗朗都可以投入一起唱。
唱完歌就畫畫，畫蘋果，有家長影相，我又影底朗朗B的畫畫情況，麥老師見到就幫我哋每一個家長同學生合照！
我估朗朗係第一次拎顏色筆畫畫，所以有d唔知點算，要我捉住佢手仔畫。

不知不覺放學鐘晌了，放學了，老師同我講，因應朗朗B的情緒，會同校長商討建議明天暫返一個鐘課先…… 今日學校派紫菜食，

放咗學同朗朗B到麥當當食早餐行商場。

今日痴足我全日，搞到我冇得甩身睇醫生！
等到6時帶埋佢去睇，當我同醫生講病況時，朗朗坐得好定呀。
點知醫生俾咗二日假我, 咁, 明天獨自返2個鐘, 由我帶朗朗返啦...

其實我都好擔心呀.....

小b的大日子 --返學第四天． 喪喊！

8月20 (二)

今日……
朗朗B突然失控！

9：30an,嫲嫲打黎，朗朗由入學校到而家勁喊！冇收聲！於是試下打俾我, 叫朗朗聽但又唔肯聽!

10:30am 再同嫲嫲傾，原來朗朗足足喊咗成粒鐘！一踏入學校就話唔返學，跟住要出去，喊、
大喊、
喪喊！
原本入課室喊，跟住老師比佢在禮堂喊，見到車仔都唔揸！企在學校門口喊住話要出去，不停講 : ＂BB 唔返學！＂＂BB 唔返學！＂
又look地！又喊晒口同嫲嫲講，
搵爺爺、
騎馬馬、
去百佳！

嫲嫲仲話有個小朋友見朗朗 look 地 又學小Blook 地,
小B見到立即爬返上來 望住人...

小b的大日子 --返學第二天

8月16（五）

今日係朗朗第二日返學，亦都係我單獨同朗朗上課的日子。

今日下雨，返學時比較麻煩，
8：50am返到學校，譚校長已經企晌門前迎接每一個學生，入到學校先入課室坐好，朗朗玩桌上的玩具，又望住電視播的兒歌，麥老師同另一位老師入來，首先收書包收通告，跟住麥老師幫每一位家長同學生影合照一張，麥老師逗朗朗笑時，朗朗竟然返白日眼，老師同其他家長見到都笑！仲話將來朗朗應該會同大笑仔合得來，做好朋友。

突然間，學校鐘晌起，朗朗聽到呆咗咁，哈哈!! ( 嚇親 )。

今日開始正式上課，首先學生圍住老師坐，家長坐在學生後面，老師派貼紙，要求學生們如果想要就舉手要，有一兩個比較活躍就立即舉手要，但朗朗怕羞唔識舉手要，搞到差不多最後拎，之後老師講故事「大眼精」，朗朗都好留心去坐定定去聽，但係比較怕羞。故事講完放學了，今日我要留下同老師開會講介學校的生活，朗朗被安排坐另一邊同二個小朋友睇電視聽兒歌。但講到一半，朗朗忍唔耐，要走過黎找媽媽了。而其他二個小朋友坐定定繼續睇，朗朗就痴住我，搞搞震
大約10：30傾完，離開學校，同朗朗去食麥記早餐，嫲嫲今日唔舒服，我要全日照顧朗朗B .

小b的大日子 --返學第一天 ~ 開學日

8月15（四）
今日係小B的大日子 ---> 第一日返學日


今日我同老公都特登放假.
7：45am叫醒佢
擦牙洗面飲奶去廁所
落街食麥記早餐，嫲嫲爺爺都過黎。
大家一齊同小B返學，去到學校門口，嫲嫲爺爺離開了，我同老公帶小B在禮堂找位坐，不久大部份的小朋友同家長都開始到齊，首先聽譚校長講咗半個鐘的介紹，跟住入課室，聽麥老師指示找位坐，原來朗朗被編排坐近門口位置，朗朗坐底玩桌面上的玩具，而我同老公坐後面，坐好後, 向每個學生派書包，再講解每張的通告。
小朋友有小朋友玩，大人聽老師的指示，其實場面都幾運亂！好在有老公幫手聽.
10:00pm 放學了，嫲嫲爺爺等放學了.

媽媽永遠都係最偉大的

8月5日 , 黃昏6時許, 大肚同事 來電, 佢終於做咗媽媽, BB 仔出世了,

霋時間, 令我想起 2年前的6月7日 , 我都經歷過呢種女人最痛 - 生仔10級痛的之味,

當時, 好彩捱咗 7個鐘頭,  朗朗B 就出世喇.

立即回顧番先

搏鬥 7 粒鐘, BB 出世了

回顧返................

2011年 6月6日 晚上....

 

食完晚飯回家. 覺得肚子唔舒服,

10:00pm 後肚子開始痛, 久不久痛一陣, 之後又冇事. 起初我真係以為自己食錯野肚仔痛咋.

 

去到12:00am , 肚痛的感覺密咗, 而且痛起上黎係好痛嗰隻.  於是叫老公幫我 mark 時間, 的而且確每5 ~ 10分鐘痛一次.每次大約40幾秒. 呢種痛就係叫 " 陣痛" 喇.  

於是老公立即至電去醫院查詢, 噢~! 要準備入院了.

 

 

入到醫院, 姑娘叫我坐輪椅, 被推上3樓, 在姑娘的協助下換上手術袍, 自己上床, 再推入待產室. 當時只有我一個大肚婆咋 ! 姑娘在我肚皮上扣上2個儀器, 我只記得其中一個係Check 住BB 的心跳. 我開始感到好痛, 姑娘替我腰間打上一支釘, 又給我嗅 " 笑氣" , 話每當我痛得緊要就拎黎嗅幾啖, 可以減低痛楚, 之後陣痛得好密, 我想去厠所, 但姑娘已經唔準我落床, 於是俾咗個兜兜我"朗"住個PAT PAT 要自己 DIY.......

 

我開始好辛苦, 但姑娘話我只開咗一度 ! 跟住姑娘見我咁辛苦, 俾埋氧氣我吸, 老公一直陪住我, 我又不段嗅笑氣, 搞到自己神智不清, 開始呆呆地, 唔知等到幾點, 老公同我講, 佢駕車回一回家, 沖一沖涼, 望望臭GREG , 我迷迷糊糊答應佢, 叫佢快d返, 都唔知幾時待產房另一邊黎咗對夫婦, 我聽到佢地講國語的, 兩公婆有講有笑, 而我就痛到依依哦哦, 我估佢地係開刀等生仔.  突破間, 我 feel 到我自己穿咗羊水, 於是按制call 姑娘入黎, 姑娘話我係穿咗羊水但開咗 3度, 要我再等. 姑娘仲問我先生係咪回咗家, 我仲識答佢係. 一陣再返黎. 老公唔在我身邊, 我不斷嗅笑氣, 嗅到瞓著了......

 

迷迷湖湖下, 老公又出現我眼前, 我開始連嗅笑氣的氣力都冇了, 老公又call 姑娘黎睇下, 發現我已經開到5 ~ 6度, 但都要繼續等, 我突然間捉住姑娘隻手唔放, 因為我實在太辛苦, 可惜姑娘都係叫我繼續嗅住笑氣等啦......... 嗅得多又瞓著了.. 等等等等.... 突然 ! 我俾連人戴床推離咗待產房, 直推入手術室, 呢一刻, 我知道我終於生得喇 ))))))

 

唔知點解, 姑娘要我自己一個爬過隔離手術床, 又唔知點解, 老公又會企咗我身邊, 呢個時候,  我聽到班姑娘問

" 通知咗霍醫生未呀 ? "  

" 未 ! " 

 

心想唔係麻, 我生得喎, 仲未通知 ??!!! 霋時間, 見到霍醫生咩住個手袋衝入黎, 用 9秒9的速度穿起醫生袍幫我接生.  可能我冇乜力, 醫生要用"吸盆"幫手, 大力push 一下, 頭仔出咗, 再用力push 多幾下, BB 終於出世喇.  姑娘替我二邊大腿各打一支止痛針, 又替BB 清洗, 之後抱過黎給我看. 放在我身邊, 我聽到 BB 依依哦哦, 姑娘又替我們一家三口影相, 影完相後 .便推回房休息


望望個鐘.... 早上7點幾了

Disney Baby 雜誌

呢本雜誌都買咗一段日子, 但遲遲都唔記得post 上黎. 真慚愧.

見到個書名,唔駛多講, 大家都知道本雜誌內容介紹咩嘢啦

第一頁附送精美貼紙.

呢本幾頁細size 的書仔, 係釘在雜誌頭一頁內, 埋邊有墟線指示, 示意各位家長可以cut 出黎, 同小朋友講故事 

印刷非常精美 ! 包括二個故事, 雖然我唔識日文, 但我同各位媽媽可以用自己的豐富的幻想力 + 無限的創意力, 為小朋友素做出精彩的故事內容

介紹親子活動, 但活動範圍只提供日本地方  ~ Disney Land

另介紹各年齡小朋友的合適書籍

仲有, 大量推介的小朋支的日常用具, 衣褲鞋襪,  玩具, 媽媽用品.......等等

呀, 仲有親子廚房以及教導媽媽如何煮出好味道的幼兒食物.

講完內容, 跟住要介紹下隨雜誌附送的米奇大袋 !
真係非常適合媽媽用的奶粉袋 !

本人親自示範